RUS
SMARTNEWS.KZ басылымының хабарлауынша, әйелдер теннисі қауымдастығының (WTA) жаңартылған рейтінгісінде қазақстандық теннисші Юлия Путинцева 23-орынға көтерілді. Бұл туралы Kazinform жазды.
Өткен аптада Аделаида (Аустралия) WTA 500 турнирінің жартылай финалына дейін жеткен Ю.Путинцева өзінің жеке рекордын тағы бір жаңартты.
Бір апта бұрын ол 29-дан 25-ке жоғарылап, өзінің спорттық жолындағы үздік көрсеткішіне қол жеткізген еді.
Аделаидада финалға дейін жеткен америкалық Джессика Пегула қазақстандық Елена Рыбакинаны ығыстырып, алтыншы орынға шықты.
Е.Рыбакина 7-сатыға түсіп қалды.
Жұптық сында Қазақстанның үздігі Анна Данилина 23-тен қайтадан 22-ге көтерілсе, Ю.Путинцева 111-ден 108-ге ауысты. Жібек Құламбаева бұрынғыша 156-да тұр.
Е.Рыбакина, Ю.Путинцева және А.Данилина Мельбурнда өтіп жатқан Аустралия ашық чемпионатында сәтті өнер көрсетсе, әлемдік рейтингідегі жағдайларын жақсарта алады.
Е.Рыбакина 14 қаңтар күні алғашқы айналымда аустралиялық, 16 жастағы Эмерсон Джонспен, Ю.Путинцева армениялық Элина Авенисянмен ойнайды.
«Үлкен дулыға» турнирінің 8-ракеткалары болып тіркелген А.Данилина – ресейлік Ирина Хромачева бастапқы кездесуін ресейлік Камилла Рахимова – испаниялық Сара Соррибес-Тормомен өткізеді.