RUS
SMARTNEWS.KZ басылымының хабарлауынша, Хоккейден Қазақстан әйелдер құрамасы Италияда өтіп жатқан қысқы Универсиада ойындарын ірі жеңіліспен бастады.
2025 жылғы қысқы Универсиада ойындарының ашылу салтанаты 13 қаңтарда Туринде өтеді. Дегенмен бұл додада хоккей ойындары басталып кетті. Қазақстан әйелдер құрамасы В тобындағы алғашқы матчында Жапониядан 0:10 есебімен жеңіліп қалды.
Жапония құрамасы сапынан Сакура Китамура (4, 10-минуттар), Рири Норо (16), Марин Нагаока (19), Комомо Ито (35), Минами Камада (42), Рука Киекава (50), Шиеру Хигучи (54) және Кахо Сузуки (56) шайба соқты.
Бүкіл матч бойы Жапония құрамасы қарсыластарының қақпасына 68 соққы жасады.
В тобындағы бірінші айналымның тағы бір кездесуінде Чехия құрамасы АҚШ-ты 6:3 есебімен ұтты. Осылайша, қазақстандық хоккейшілер қосымша көрсеткіштер бойынша америкалықтарды алға жіберіп, топтың соңғы орнына жайғасты. Жапониялықтар көш бастаса, Чехия құрамасы екінші орынға табан тіреді.
Айта кетейік, жартылай финалға жолдама алу үшін топтық кезеңде үздік екі құраманың қатарына іліну керек. Екінші айналымда қазақстандық хоккейшілер 14 қаңтарда Чехиямен ойнайды.