RUS
SMARTNEWS.KZ басылымының хабарлауынша, желіде мектеп асханасында аспаздардың оқушыларға тамақ қалдықтарын жылытып, қайта берген видеосы тарады. Желі қолданушысының мәлімдеуінше, оқиға Алматыда №67 орта мектептің асханасында болған. Бұл туралы Stan.kz жазды.
Сәуле Айтмағанбетова есімді желі қолданушысы парақшасында №67 мектеп асханасының санитарлық талаптарға сай келмейтінін дәлелдейтін бірнеше видео жариялаған. Сөзінше, асханада бірнеше күн бұрын дайындалған бәліштер мен пиццалар сатыла береді. Яғни оқушыларға мерзімі өткен өнімдер беріледі.
Одан бөлек видео авторы қалған котлеттерді қатырып, кейін қайтадан оқушыларға салып беретінін, ыдыста қалып қойған қалдық тамақтарды жинап, басқа оқушыларға салып беретінін айтады. Айтмағанбетова 9 қаңтардағы жазбаны бөлісті.
Ол мектеп асханасына тексеріс жүргізуді талап етті.
Stan.kz тілшісі жағдайға қатысты Алматы облыстық білім басқармасынан пікір сұраған. Білім басқармасы мектепке тексеріс жібергенін мәлімдеді.
“№67 орта мектепке аталған барлық мән-жайды зерделеу үшін тамақ сапасын бақылау жөніндегі ведомствоаралық топтың жұмыс комиссиясы жіберілді.
Барлық мектепте тексеру комиссиялары құрылды, олардың құрамына мектеп әкімшілігінің өкілдері, әлеуметтік қызметкер, медицина қызметкері және ата-аналар қоғамдастығының мүшелері кіреді. Ұсынылатын тағамның сапасын сапаны бақылау комиссиясы айына екі рет, ал күн сайын мектептің медициналық қызметкері тексереді”, – деп түсіндірді білім басқармасының баспасөз қызметі.
Ведомство мәліметінше, тамақ қалдықтары балаларға қайтадан берілмеуі тиіс.
“Денсаулық сақтау министрінің 2022 жылғы 17 ақпандағы бұйрығымен бекітілген "Қоғамдық тамақтандыру объектілеріне қойылатын санитариялық-эпидемиологиялық талаптардың" 65 санитарлық тармағына сәйкес тамақ қалдықтары асханадан бөлек жерде, далаға шығатын тұста контейнерлерге лақтырылуы керек”, – делінген хабарламада.