Сирек кездесетін «Хәрри Поттер» кітабының алғашқы басылымы қоқыстан табылды

SMARTNEWS.KZ басылымының хабарлауынша, бұл кітаптың тек 500 данасы кездесетіні белгілі болды. Бұл туралы Kazinform жазды.

«Хәрри Поттер және философиялық тастың» тұңғыш басылымы қоқыстан табылған соң 40 000 фунт стерлингке, теңгеге шаққанда шамамен 26 млн теңге сомаға сатылған.

Девон графствосы Пейнтон қаласындағы NLB аукцион үйінің иесі Дэниел Пирс кітапты қайтыс болған ер адамның заттарының арасынан тапқан.

— Бұл біздің ең үлкен олжамыз. Отбасы қуанып қалды, олар мұны мүлде күтпеген еді… Бұл олар үшін қомақты қаржы әкелетін болады. Кітап сөреде 20 жыл бойы сақталған, - деді ол.

Ол кітапты қоқыс жәшігіндегі заттардың арасынан тапты.

Пирс алғашқы баспаның 200 данасы кітап дүкендеріне, 300 данасы кітапханаларға жіберілгенін айтты.

— Бұл сол 300-дің бірі, — деді ол.

Оның айтуынша, кітап өте жақсы жағдайда.

Бірінші бетте қарындашпен белгіленген 2 фунт стерлинг деген бағасы бар, бұл — кітапхана сататын баға.

Бірінші басылымның ерекшелігі, оның артқы мұқабасындағы «философиялық» сөзінде «о» әрпі қалып қойған.

Ол сондай-ақ осындай күйдегі тағы бір көшірме қараша айында 42 000 фунт стерлингке сатылғанын айтты.

Еске сала кетейік, бұған дейін «Хәрри Поттерде» ойнаған Мэгги Смит 89 жасында өмірден өткенін жазған едік.