RUS
SMARTNEWS.KZ басылымының хабарлауынша, Ресейде жұмысын тоқтатқан қандай кәсіпорындар Алматыға көшіп келді. Бұл туралы Kazinform жазды.
Алматы қаласы Кәсіпкерлік және инвестициялар басқарма басшысының орынбасары Қайрат Нұрқасымов агенттік сауалына жауап бере отырып, әкімдік Ресей Федерациясында қызметін тоқтатқан ірі өнеркәсіптік кәсіпорындар мен халықаралық корпорацияларды мегаполиске әкелу бойынша белсенді жұмыс істеп жатқанын айтты.
Оның сөзінше, қалада InDriver, Koppert (био тыңайтқыштар мен өсімдіктерді қорғау өндірісі), Stada Arzneimittel (фармацевтикалық өндіріс), Great Wall Motors (автомобиль өндірісі), Clariant, China Railway Construction Corporation (теміржол құрылыс корпорациясы) және WEG (электр жабдықтарын өндіру) сияқты компаниялардың аймақтық кеңселері ашылды.
Сонымен қатар бұрын өз қызметін Ресейде жүзеге асырған Honeywell компаниясы 2022 жылы Алматыда басқару қораптарын құрастыру бойынша жаңа өндіріс орнын іске қосты. Ал индустриялық аймақта Weir Minerals зауыты сорғы жабдықтарын, гидроциклондарды және бекіту арматурасын өндіру және қалпына келтіру бойынша жұмысын бастады. Оған 1,25 млрд теңге инвестиция салынып, 60-тан астам жұмыс орны құрылды.