RUS
SMARTNEWS.KZ басылымының хабарлауынша, Мұрат Иманғазинов биылғы 19 қаңтар күні Сауд Арабиясындағы Жидда қаласынан қажылықтан Алматыға ұшақпен ұшып келе жатқан.
Ол тұмауға қарсы дәрінің бірнешеуін ішіп, ұйықтап кеткен. Кенеттен бет-аузы адам танымастай ісіп кетіп оянғанда аллергиялық ауру пайда болғанын сезген. Тынысы тарылып, қан қысымы көтеріліп, жағдайы нашарлаған.
Сол сәтте ұшақта болған Жетісу облысының дәрігері Жаннұр Сырымов бірден жанына келіп, система салған.
– Қап тауларының үстінде ұшып келе жатқан едік. Экипаж шұғыл жағдай болса, ұшақты жақын маңдағы әуежайдың біріне қондырмақ болған. Дәрігер шұғыл көмек көрсетіп, Алматыға аман түсірді. Өлім аузынан аман алып қалған адамға алғысым зор, – дейді Мұрат Иманғазинов.
Жетісу облысы, Көксу аудандық ауруханасының бас дәрігері болып қызмет атқаратын Жаннұр Сырымов сол сапарында Меккеге мүгедек әкесін қажылыққа апарып, қайтып келе жатқан. Ол бортсерік қыздың хабарлауынан соң науқастың жанына жедел барып, көзінің айналасы мен беті ісіне бастағанын көрген.
– Жолаушыда анафилактикалық шок, яғни «Квинке ісінуі» байқалды. Егер 15-20 минут ішінде адамға медициналық көмек көрсетілмесе, өліп кетуі мүмкін. Бірден тиісті препаратты егіп, қан қысымын өлшедім, тілінің астына таблетка салдым. Жағдайы тұрақталған уақытта система қойдым. Әрі бортсерік қыз да көмектесті, – дейді ақ желеңді.
Айта кетерлігі, Жаннұр Сырымов негізі медицина саласындағы алғашқы қызметін санитарлық фельдшер болып бастаған. Көксу ауданындағы қызметіне дейін Алматыдағы Сызғанов атындағы ұлттық ғылыми хирургия орталығында бүйрек трансплантологиясы, урология және экстракорпоралды детоксикация бөлімшесінің меңгерушісі, Талдықорған қаласында аурухана басшысының орынбасары болған.
Алматы әуежайы Flynas әуе компаниясының ұшағын әуежайға қондырып, Мұрат Иманғазиновты жедел жәрдеммен күтіп алған. Бүгінде оның жағдайы қалыпты.