RUS
SMARTNEWS.KZ басылымының хабарлауынша, прокурор аса ірі көлемде сеніп тапсырылған мүлікті жымқырды деп айыпталған Астана қаласы Мәдениет басқармасының бұрынғы басшысы Болат Мажағұловты 10 жылға бас бостандығынан айыруды сұрады.
Астанада 2016 жылы Есіл өзеніне орнатылған «Күн» субұрқағы бойынша атышулы іс бойынша сот жалғасуда.
Елорданың қылмыстық істер жөніндегі ауданаралық соты субұрқақ құрылысы кезіндегі ұрлық фактісі бойынша тараптардың дауын бастады.
Мемлекеттік айыптаушы Азамат Тоқтарбай Мәдениет басқармасының бұрынғы басшысы Болат Мажағұлов пен инженер Мәди Қанапинді жазалауды сұрады.
«Болат Мажағұловты Қылмыстық кодекстің 189-бабының 4-бөлігінің 2-тармағында («Аса ірі мөлшерде сеніп тапсырылған бөтен мүлікті иеленіп алу немесе жымқыру») қылмыстық құқық бұзушылық жасағаны үшін кінәлі деп танып, өмір бойына мемлекеттік қызметте қызмет ету құқығынан айырып, оны 10 жылға бас бостандығынан айыруды сұраймын», - деп хабарлады прокурор.
Мемлекеттік айыптаушы инженер Мәди Қанапинді Қылмыстық кодекстің 28-бабының 5-бөлігімен («Қолдас болу») және 189-баптың 4-бөлігінің 2-тармағында көзделген қылмыстық құқық бұзушылықтарды жасағаны үшін кінәлі деп танып, өмір бойына мемлекеттік қызметте лауазымдарды атқару құқығынан және 7 жылға бас бостандығынан айыруды сұрады.