RUS
SMARTNEWS.KZ басылымының хабарлауынша, Батыс Қазақстан облыстық онкологиялық диспансердің дәрігерлері әйелден салмағы 9 келі болатын алып жатыр ісігін алып тастады.
Операцияны тәжірибелі онкохирургтер Руслан Сәйденов пен Есенбек Ағайбаев жасады. Алынған ісіктің ұзындығы 40 сантиметр болды.
Облыстық денсаулық сақтау басқармасының мәліметінше, ота сәтті өткен. Қазір 41 жастағы науқас өзін жақсы сезінеді. Айта кетейік, әйел бұрын онкологиялық және басқа да аурулар бойынша есепте тұрмаған. Дәрігерге де қаралмаған. Дәрігерге іштің төменгі бөлігінде қатты ауырсыну пайда болған кезде ғана келген. Дәрігерлер диагноз кезінде ғана әйелден үлкен ісік барын анықтаған.
Онкологиялық диспансер дәрігерлері облыс тұрғындарына дер кезінде скринингтік тексеруден өтуге кеңес береді.