Қазақстанда үш судья жазаланды

SMARTNEWS.KZ басылымының хабарлауынша, Жоғарғы Сот Кеңесінің Сот қазысы жеті судьяға қатысты тәртіптік істі қарады.

Отырыста қарау қорытындысы бойынша өрескел заң бұзушылыққа жол берген үш судья тәртіптік жауапкершілікке тартылды. Бір судья сөгіс алды, екеуі қызметінен босатылды.

«4 судьяға қатысты тәртіптік іс тоқтатылды. Оның 1-і тәртіптік теріс қылық белгілерінің болмауына байланысты, 1-і қылмыстық жауапкершілікке тартудың ескіру мерзімінің өтуіне байланысты, 2 судья өз өтініші бойынша қызметінен босатылды», - делінген хабарламада.

Сонымен қатар, бір судьяның бұрын қолданылған тәртіптік жазаны мерзімінен бұрын алып тастау туралы өтініші қанағаттандырусыз қалдырылды.

Бұл шешімдер әлі заңды күшіне енген жоқ, өйткені жазаға тартылған судьялар Жоғарғы Сот Кеңесіне шағымдана алады.