RUS
Басқосуда «Ақтау – Түркі әлемінің мәдени астанасы» атты ауқымды мәдени жобаны ұйымдастыру және өткізу мәселелері талқыланды.
Шара аясында сәуір айында салтанатты ашылу салтанаты өтіп, қараша айының ортасына дейін әр айға арнайы тақырыптық бағыттармен 30-ға жуық ірі іс-шара ұйымдастырылады. Ашылу салтанатында 500-ден астам өнерпаз қатысып, этноқалашық бой көтереді. Онда түркі халықтарының мәдениеті мен дәстүрін таныстыратын жеті ауыл қызмет көрсетеді.
«ТҮРКСОЙ» ұйымының бас хатшысы Сұлтан Раев Ақтау қаласының ерекшелігін атап өтіп, оның Каспий теңізінің жағасында орналасуы, тарихи мұрасы мен заманауи келбетінің түркі әлемінің мәдени астаналары арасында бірегей екенін атап өтті.
Маңғыстау облысының әкімі Нұрдәулет Қилыбай шараның маңыздылығын атап, оны жоғары деңгейде өткізу керектігін айтты. Ол: «Ақтау қаласының Түркі әлемінің мәдени астанасы атануы – біз үшін үлкен мәртебе ғана емес, зор жауапкершілік. Біз бұл мүмкіндікті пайдаланып, өңіріміздің мәдени әлеуетін жаһандық деңгейде көрсетуге тиіспіз», – деді.
Шара аясында театр, кино, опера, би, дәстүрлі өнер, ақындар айтысы, суретшілер симпозиумы, қолөнер шеберлерінің фестивалі, тарихи-ғылыми конференциялар және басқа да мағыналы іс-шаралар өткізіледі.