RUS
SMARTNEWS.KZ басылымының хабарлауынша, 11 ақпанда тұрғын үйлердің бірінде жасөспірім лифт ішінде пышақпен 5 жасар балаға шабуыл жасаған. Қайғылы жағдай көршілерді дүр сілкіндірді. Бұл олардың тұрғын үй кешенінің ауласында болғанына көпшілік сене алмайды. Tengrinews.kz ауданды аралап, болған оқиғаға қатысты үй тұрғындарының не айтып жатқанын анықтады.
Үй тұрғындары не болғанын талқылайды, олардың арасында қорқыныш пен шиеленіс сезіледі. Зардап шеккен баланың көршілері болған оқиғадан әлі айыға алмай келеді. Олар бес жасар Батырды өте мейірімді, белсенді, көпшіл бала ретінде таниды. Үй тұрғындарының бірінің айтуынша, ол ауланың нағыз сүйіктісі болған: үйірмелерге баратын, адамдармен оңай араласатын және әрқашан жақсы көңіл-күйде болатын.
"Ол өте көпшіл, барлық жерге барады: мектепке де, үйірмеге де барады. Жалпы, ол біздің сүйікті, сондай жігерлі, мейірімді бала. Ол бәрімен араласады, лифтте бірдеңе айтып, сұрақ қояды. Үйде болсам да оның мектептен, сосын үйірмелерге кетіп бара жатқанын көремін. Осының бәрінен әлі шошып жүрмін", - дейді көршісі.
Фото:Tengrinews
Көршілерінің айтуынша, шабуыл жасаған бала бұл жақтан емес: ол басқа ауданнан келген. Тұрғындар агрессордың жанұясының оңаша өмір сүргенін, олар басқалармен араласпай, аулақ жүруге тырысқанын еске алады. Көпшілік жасөспірімнің мезгіл-мезгіл мазасызданғанын атап өтті.
"Олар онша көпшіл емес. Кейде пәтерден шу естіледі. Баланың айқайлағаны сияқты. Осының барлығын ас үйден естіп тұратынмын. Айқай кенет тынышталып қалатын еді. Мен анасы мен әжесін танимын, бірақ араласпаймыз", - дейді әйел.
Фото:Tengrinews
Үйдің басқа тұрғындары да отбасының оңаша өмір сүргенін, жасөспірімнің көшеде сирек кездесетінін атап өтті.
Фото:Tengrinews
Қайғылы оқиғадан кейін тұрғындар үйдегі чаттарда балаларының қауіпсіздігін талқылайды. Енді не істеу керек, құқық қорғау органдары қандай шара қолданатынын талқылап жатыр.
"Мен жағдай туралы оқып білдім, бұрын білмеппін. Үйдегі чаттарда мына бала осында тұрады деп жазады, ал қазір тұрғын үй кооперативінің төрағасы оны оқшауланған деп айтты. Бұл деген шектен шығу ғой. Мен ол баланы танымаймын да. Тұрғын үй кооперативі жұртты уайымдамауға шақырды. Бірақ чатта, әрине, тұрғындардың бәрі үйден баласын шығаруға қорқып қалды", - дейді тұрғындардың бірі.
Еске салайық, елордадағы тұрғын үй кешенінің лифтінде болған жан түршігерлік оқиға қазақстандықтарды есеңгіретіп тастаған болатын. 14 жастағы жасөспірім бес жасар балаға шабуыл жасап, оның бетін пышақпен тіліп алған. Кейін белгілі болғандай, шабуыл жасаған адам жүйке-психиатриялық диспансерде есепте тұрған.