RUS
SMARTNEWS.KZ басылымының хабарлауынша, Павлодар облысында оқу мен жазуды білмейтін екі баласы бар қазақстандық әйелді туыстары үйсіз қалдырды. Әйелдің қараусыз қалғанын мектеп мұғалімдері хабарлаған. Бұл туралы Stan.kz жазды.
Аз білімді павлодарлық әйел туыстарының алдауымен ата-анасының үйінен айырылып, екі баласымен бірге далада қалған. Қазір ол Павлодардағы әйелдер мен балаларға арналған әлеуметтік-психологиялық оңалту және бейімдеу орталығына орналастырылды. Әйелдің қиын жағдайға түскенін қала мектептерінің бірінің мұғалімдері хабарлаған.
"Әйел біраз уақыт азаматтық күйеуімен бірге Ресейде тұрған, бірақ тұру мерзімі аяқталған соң, еліне оралуға мәжбүр болған. Өмірінде мектепте оқымағандықтан, оқу-жазу білмейді. Сол себепті туыстары оны алдап, ата-анасының үйін өз аттарына рәсімдеп алған", – деп мәлімдеді Павлодар қаласының жұмыспен қамту және әлеуметтік бағдарламалар бөлімі.
Қазір әйел балаларымен бірге орталықта тұрып жатыр. Онда қызметкерлер оған жұмыс табуға көмектесіп, балаларын мектепке орналастырған.
"Сонымен қатар орталықтың заңгері мұрагерлікті қабылдау бойынша жұмыс істеп жатыр. Әйел Ресейде әкесімен бірге тұрып жатқан кіші ұлын қатты сағынады. Бірақ әзірге оны алып кетуге мүмкіндігі жоқ", – деп атап өтті жұмыспен қамту және әлеуметтік бағдарламалар бөлімі.