RUS
SMARTNEWS.KZ басылымының хабарлауынша, Алматыдағы «Ахляк» балабақшасында тәрбиешінің баланы тұншықтырғаны бейнебақылау камерасына түсіп қалған.
Алматы қаласындағы «Ахляк» балабақшасының бейнебақылау камерасына төрт жасар баланың тәрбиеші тарапынан зорлық-зомбылық көргені жазылып қалған. Кадрларда тәрбиешінің бүлдіршінді тұншықтырып, ұрып-соғып,жұлқылап жатқаны анық байқалады. Оқиға кезінде бөлмеде тағы екі қызметкер болғанымен, олар ешқандай шара қолданбай, өз жұмыстарымен айналысқан.
Баланың анасы Бану Төлеуішеваның айтуынша, ұлы бұл балабақшаға небәрі бір апта бұрын ауыстырылған. Ата-анасы мекемеге барып, бейнежазбаларды көруді талап еткенде, балабақша қызметкерлері камералардың істемей тұрғанын сылтау етіп, жазбаны көрсетуден жалтаруға тырысқан.
12 ақпанда балам: “Мама, апай мені ұрды, жұлқылады” деп, қолымен қалай болғанын көрсетіп айтты. Бірақ мен аса мән бермедім. Келесі күні “Мама, мені апай тұншықтырды” дегенде ғана әкесі екеуіміз балабақшаға барып, мән-жайды анықтауға тырыстық. Камераларды көрсетуді талап еткенімізде, олар ұзақ уақыт бойы камера істемейді деп шығарып салмақ болды. Тек полиция шақырамыз дегенімізде ғана қорыққандарынан жазбаны көрсетті. Видеода баламды 10 минут бойы бірнеше рет тұншықтырып, мойнын қысып, аузы мен мұрнын жауып тұрғанын көрдік, – деп жазды баланың анасы.
Бейнежазбада екі күн ішінде екі түрлі тәрбиешінің баланы ұрып-соғып, тұншықтырғаны анық көрінеді.
«Ахляк» сөзі араб тілінен аударғанда «мораль», «этика» және «тәрбие» деген мағынаны білдіреді. Бұл – діни бағыттағы жекеменшік балабақша желісі, оның Алматыда бірнеше филиалы бар. Жеке меншік болғандықтан, олардың жұмыс бағытын иелері өз қалауларына қарай белгілейді.