RUS
SMARTNEWS.KZ басылымының хабарлауынша, іздестіру-құтқару жұмыстары барысында «Қазақмыс корпорациясы» ЖШС-не тиесілі кеніштен жетінші қызметкердің денесі табылды. Оның кім екені анықталып жатыр.
ҚР Төтенше жағдайлар министрлігі баспасөз қызметінің хабарлауынша, қайтыс болған жеті жұмысшының денесі жоғарыға көтеріліп, сот-медициналық сараптама жүргізу үшін полиция қызметкерлеріне тапсырылды.
ҚР ТЖМ Жедел штабының «жедел желісіне» 23 қоңырау келіп түскен. Ресми дерекке қарағанда, шахтада тау массасы құлаған.
Қайғылы жағдайдан соң Ұлытау облысының әкімдігі қаза болғандардың отбасыларына көмек көрсетететін мәлімдеді.
— Қайғылы оқиға баршамыздың жүрегімізге ауыр тиді. Бұл жағдай — бірнеше отбасы үшін орны толмайтын қаза. Қайтыс болған кеншілердің туған-туыстарына, жақындарына шын жүректен көңіл айтамын. Бұл қасірет баршамыз үшін оңайға соққан жоқ. Қаза тапқандардың отбасыларына қажетті көмек көрсету үшін барлық тиісті шара қабылданады, — делінген көңіл айту жеделхатында.
Ал Мемлекет басшысы Үкіметке төтенше жағдайдың мән-жайын мұқият тексеру жөнінде міндет жүктеп, қайғы жамылған отбасыларға көңіл айтты. Сондай-ақ салалық ведомстволар мен өңір әкімдігіне марқұмдардың отбасыларына барлық қажетті көмек көрсету туралы тапсырма берілген.