RUS
SMARTNEWS.KZ басылымының хабарлауынша, Түркияның Белек қаласында оқу-жаттығу жиынын өткізіп жатқан Қазақстан футбол құрамасы жолдастық кездесуде жеңілді.
Жақында ғана футболдан Қазақстан құрамасы бас бапкерінің қызметін уақытша атқарушы болып тағайындалған Әли Әлиев ақпанның 10-18 арасында оқу-жаттығу жиындарын өткізіп жатыр. Бұл жиында негізгі құрам ойыншылары шақырту алмады. Командаға үміткер футболшылардан құралған құрам екі жолдастық кездесу өткізді.
Алғашқы ойынды Ташкенттің “Локомотив” командасына қарсы өткізді. Ұлттық құрама бұл кездесуде 1:1 есебімен тең аяқтады. Отандастарымыздың сапынан жалғыз голды “Қайсар” футбол клубының шабуылшысы Айбар Жақсылықов соқты.
Екінші ойын кеше КХДР құрамасына қарсы өтті. Бұл ойында ұлттық құрама 2:0 есебімен жеңіліп қалды.
Ойыннан кейін Әли Әлиев өз сұхбатында бұл экспериментті құрама екенін айтып өтті.
“Бұл ойыншылар тек қосалқы құрамның ойыншылары, ұлттық құраманың негізгі футболшылары емес. Сондықтан ойын нәтижесін қатты сынға алмауларыңызды сұраймыз. Бұл құрамды эксперименталды құрам деп айтасыздар ма әлде резерв құрам дейсіздер ме, өздеріңіз білесіздер. Ойынға келсек, қос команданың да жақсы мүмкіндіктері болды. Егер Айбар Жақсылықовқа сәттілік серік болғанда, таблода есеп басқаша болар еді”, – деді Әлиев.