RUS
SMARTNEWS.KZ басылымының хабарлауынша, "Жомарт" кенішінде ажал құшқан Бақытбек Жұмаділлаевты жақындары ақтық сапарға шығарып салды. Бұл туралы Stan.kz жазды.
Марқұмның Түркістан облысынан Қарағандыға қатынап жұмыс істеп жүргеніне жиырма жылдан асқан. Бейнетінің зейнетін көрер шақтағы оның қазасын жақындары басшылық салғырттығынан көреді.
49 жастағы жігіт ағасының жаназасына Түркістан облысының әкімі мен "Жомарт" кенішінің өкілдері де келген. Марқұмның артында кәмелет жасына толмаған 4 баласы мен келіншегі қалды. Ұлдарының үлкені 11 жаста болса, кішісі небәрі 4-те. Үйінің жалғыз асыраушысынан айрылған әйелі болса қаралы хабарға сене алар емеспін дейді.
"17-күні он жарымдарда естідім. кешкі. Азанға түскен негізі ауысымға. Бестердің уақытында болған дейді. Енді бес жыл шыдасам, зейнетке кетем деп жүрген еді. Балажан. Балаларына жақсы қарайтын. Бәріне аңқылдап жаным-ау. Ондай адам жоқ шығар”, – дейді марқұмның әйелі Сандуғаш Нұржанова.
Бақытбек Жұмаділлаевтың Түркістаннан Қарағандыға қатынап жұмыс істеп жүргеніне 20 жыл болған. Енді бір бес жылдан кейін зейнетке шығуды жоспарлаған жігіт ағасы ол күнге жете алмады. Осыны айтып жылаған жақындары мақұмның өте адал әрі ешкіммен қақ-соғы болмағанын айтады. 15 күн Ұлытауда жұмыс істеп, 15 күн Түркістанда өз үйінде болатын төрт баланың әкесі ауысымға 4 күн бұрын ғана барған екен.
"Немқұрайлы кіргізіп отыр ғой. Ол мысалы шахтаға кірерде қол қойып жұмысқа түсті. Бастықтары жарамды деп жіберді. Жарамды болса, неге атылады? Өйткені ауа айналымы жоқ. Ауа кететін болса, газ атылмас еді. 20 жыл стажы бар мысалы. Қанша бейнеті сіңген адам ол жерде. Осы бала-шағасын бағамын деп... Сол айлығы жетіп отырса, неге жақсы үй салмайды?! Шахтаның ақшасы артып жатыр дейсіздер. Ештеңеге де жетпейді ол”, – дейді Бақытбек Жұмадәллаевтың туысы Қарлығаш Сәрсенбаева.
Бақытбек отбасының жалғыз асыраушысы болған. Әкесінің жұмыстан келуін күтіп жүрген ұлдары әлі оның ажал құшқанын білмейді. Туыстары Түркістан облысының әкімдігі 1 миллион теңге табыстағанын мәлімдеді. Қара жамылған отбасы баспанадан да бас бартпайтынын айтып отыр. Өйткені, шахтер отбасы Түркістан қаласындағы аядай үйде күнелтіп келген.