RUS
SMARTNEWS.KZ басылымының хабарлауынша, танымал коуч, квант техникасын үйретуші тәлімгер Нұрлан Жанайдың басы дауға қалды. Бұл туралы Stan.kz жазды.
"12 миллион теңгені санап берген": Коуч Нұрлан Жанайға алданған зейнеткер ақшасын қайтара алмай жүр
Астананың зейнеткер тұрғыны коучтың кітабына инвестор болып, жинап жүрген ақшасын санап берген. Алайда тәлімгерін таппай қалған.
“Маусым мен шілде аяқталғаннан кейін өтірік айтып жүргенін білдім. 12 миллион теңгені санап бердім. Әйелі мен келіншегіне аудардым. Бір жылдан бері ала алмай жүргесін өзім де сұрай бастадым. Сол кезде 5 миллион теңгені қайтарды. Қалған 7 миллион теңгемді бермей жүр. Күн сайын “ертең беремін” деп алдады. Соңғы рет сөйлескенде “Банктен 8 миллион теңгені рәсімдеп қойдым. Сізге беремін” деді. Оны да күттім. Еш жауап жоқ. Адвокатым бар. Құзырлы органдарға шағым түсірдік. Бірақ қанша уақыт өтсе де, іс қозғалмаған”, – деді зейнеткер.
Адвокаттың сөзінше, екі рет талап-арыз түсірсе де, айыпталушы тараптан жауап алмаған көрінеді.
“Екі рет арыз жаздық. Олар ескерілмеді. Одан кейін полицияға да хабарластық. Алған ақшасын қайтармағаны үшін, барлық құжаттарды тіркеп заң аясында мәселенің шешілуін қаладық. Ақшаны бермей отырған адамнан сұрақ-жауап та алмаған”, – деді заң өкілі.
Танымал желі жұлдызы, коуч-тәлімгер арна тілшісінің сұрағына жауап бермеді. Көмекшісі екі сағаттан кейін хабарласады десе де, кейін нөмерді бұғаттап тастаған.
Жәбірленушінің айтуынша, Нұрлан Жанай журналистердің іс-әрекетінен кейін, адвокатына хабарласып, келісімге келу ұсынысын айтқан. Алайда зейнеткер бас тартып, алдағы уақытта басқа адамдарға зиянын тигізбеу үшін азаматтық сотқа жүгінбек.