«Гонорарыма екі бөлмелі пәтер алдым»: Рахман Омар Назарбаев әулетінің тойында асаба болған кезін есіне алды

SMARTNEWS.KZ басылымының хабарлауынша, танымал актер Рахман Омар осыдан 20 жыл бұрынғы естелікті бөлісті. Бұл туралы Stan.kz жазды.  

Театр майталманы Назарбаев әулетіндегі отбасылық басқосуды Дулат Тастекеймен болған сұхбатта есіне алды. 

“2004 жылы Елбасымыздың үйіндегі жаңа жылдық кешті жүргіздім. Өздерінің жақындары ғана жиналған кеш болды. Балалары, немерелі және құда-құдағиларын шақырды. Құлыбаевтар мен Әлиевтер әулетінің үлкендері келді. Тимур Құлыбаевты сол кезде бірінші рет көрдім. Өте жинақы адам екен. Бәріне мән беріп, ұқыпты отырды. Ал, Әлиев ондай емес екен. Елбасы сөйлегенде әр сөзіне қадалып, мырс етіп күлді. Мен шошып кеттім. Тіпті, аяғын америкалықтар секілді үстелдің үстіне шығарып қойды. Сол кезде Назарбаевтың түрі бұзылып кетті. Ол кезде Әлиев ҰҚҚ-ны басқарып тұрған еді. Көрдіңіз бе, кедей бай болсам, бай құдай болсам дейді. Депутаттардың өзі қорқып жүретін”, – деді актер. 

Одан кейін театр жұлдызы той жүргізіп, ең көп қаламақы алғанын да айтты. 

“Асаба болуыма балам себепкер болды. Үш жастағы балам нанға май жағып жегізі келіп, менен сұрады. Оны алатын ақша жоқ еді. Содан тойларды жағалай бастадым. Үйден дайындалып, Төлеген мен Мұқағалидың өлеңдерін жаттаймын. Алдымен тойбастар тарататын көмекші болдым. Кейін асаба болып қызмет жасадым. Назарбаевтар әулетінің жабық кештерін көп жүргіздім. Ең көп төлеген гонорарға екі бөлмелі пәтер алдым”, – деді киножұлдыз.