RUS
SMARTNEWS.KZ басылымының хабарлауынша, АҚШ президенті Дональд Трамп Конгресс алдында сөйлеген сөзінде Украина президенті Владимир Зеленскийден келіссөздер үстеліне тезірек отыруға дайын екендігі туралы хат алғанын мәлімдеді.
Зеленскийден маңызды хат алдым... Украина ұзақ мерзімді бейбітшілікке қол жеткізу үшін келіссөздерге дайын, – деді Трамп өз сөзінде.
АҚШ президенті Украинадағы қақтығысты тоқтату қажеттігін атап өтіп, екі тараппен де диалог жүргізудің уақыты жеткенін айтты. Ол сондай-ақ Украинадағы жағдайды реттеу үшін тынымсыз жұмыс істеп жатқанын мәлімдеді.
Айта кетейік, бұған дейін Трамп Украина президенті Владимир Зеленскийдің 28 ақпанда Ақ үйге келетінін және Украинаның табиғи ресурстарына құқық беретін келісімге қол қою жоспарланғанын хабарлаған болатын.
28 ақпанда Зеленский ресми сапармен АҚШ-қа ұшып келіп, оның ұшағы Joint Base Andrews әскери әуе базасына қонды. Алайда, кездесулер барысында Трамп пен Зеленский арасында түсініспеушілік орын алып, Украина президенті АҚШ вице-президенті Дж. Д. Вэнспен жанжалдан кейін Ақ үйден шұғыл кетіп қалған.
Трамп бұл оқиғаға қатысты Зеленскийдің АҚШ-ты құрметтемейтінін және бейбітшілікке дайын емес екенін мәлімдеді. Артынша, Еуропалық Одақ басшылары мен бірқатар еуропалық көшбасшылар Украина президентін ашық қолдайтындарын білдірді.
Көп ұзамай, Дональд Трамп Пентагонға Украинаға бағытталған барлық әскери көмекті уақытша тоқтатуға бұйрық берді. Бұл шешім халықаралық қауымдастықтың назарын аудартып, екі ел арасындағы қарым-қатынастың шиеленісуіне себеп болды.
АҚШ пен Украина арасындағы соңғы оқиғалар жаһандық саясаттағы маңызды тақырыптардың біріне айналды. Алдағы уақытта екі ел арасындағы келіссөздердің қалай өрбитіні және Украина қақтығысының шешілу жолдары халықаралық қауымдастық үшін өзекті мәселе болмақ.