RUS
Бүгін Астана қаласының «Орталық Коммуникациялар Қызметінде» «ҚР Әділет Министрлігі жұмысы туралы» тақырыбында брифинг өтті. Брифингте Әділет Министрлігінің Баспасөз хатшысы Талғат Уәли Алимент төлемеген Қазақстандықтарға қандай шаралар қолданылғаны туралы сөз қозғады. Айта кетсек, 2023 жылдың статистикасы бойынша Қазақстанда 221 884 адам балаларына жалпы сомасы 18 миллиард теңгеге жуық алимент төлемеген еді, алайда қазіргі таңда бұл статистикалық көрсеткіш әлде қайда өскен. Сонда, қазір өндірісте 283 мың атқарушылық іс бар. Оның ішінде борышкер ер адамдар саны - 272 мың болса, әйелдер саны 11 мыңнан асады. Бұл атқарушылық істің- 16 352 ісі бойынша берешек 16 млрд теңгені құрайды.
Сондай-ақ, Талғат Уәли борышкерлердің жауапкершілікке тартылуы мен оларға қолданылатын алдағы шаралар жайында айта кетті:
«Өз міндеттерін орындамағаны үшін борышкерлер әкімшілік және қылмыстық жауапкершілікке тартылады. Мәселен, 2024 жылы 4,5 мыңнан астам борышкер әкімшілік жауапкершілікке тартылды. Ал ҚК 139-бабы бойынша 391 адам сотталды. Сондай-ақ борышкерлердің банк шоттарына тыйым салу және ҚР аумағынан шығуға шектеулер сияқты шаралар қолданылады».
Әділет органдары мен әкімдіктердің бірлескен жұмысының нәтижесінде 2023 жылы – 4 238 адам жұмысқа орналастырылса, бұл көрсеткіш 2024 жылы 6 мыңнан астам адамды құраған.
Автор: Дина Ғалымжанқызы