RUS
Ол бұл заттарды есірткі деп атап, оларға түбегейлі тыйым салуды ұсынды. Депутаттың пікірінше, бұл шарларды қолданғандар тек күліп қана қоймай, сондай-ақ тәуелділікке ұшырайды, ал әлемде бұл заттың қолданушыларының өлімі мен мүгедектігі күн санап артып келеді.
«Бүгінде түнгі клубтарда, караоке-барларда, тіпті үйге жеткізу арқылы ашық сатылып жатқан бұл «шарики-кумарики» жай ғана ойыншық емес! Қаншама адам осы газды қолданамын деп мүгедек болып қалды. Ақтауда бір жігіттің аяғы істемей қалды. Ресейде бірнеше адам өлімі тіркелді. Ұлыбритания мен Нидерланды бұл «көңіл көтеретін газға» түбегейлі тыйым салды. Америка Құрама Штаттарының FDA ұйымы ресми түрде азот оксидінің сал ауруына, жүйке жүйесінің бұзылуына, психикалық ауытқуға және өлімге әкелетінін мәлімдеді,» — деп атап өтті Темір Қырықбаев.
Қазақстандық депутат Нидерланд пен Ұлыбританияның тәжірибесін мысалға келтірді. Нидерланды 2023 жылдың 1 қаңтарынан бастап азот оксидін есірткі заттары қатарына енгізіп, оның сатылуына, сақталуына және пайдаланылуына тыйым салды. Ал Ұлыбритания заңды бұзғандарды 14 жылға дейін бас бостандығынан айыруды ұсынған. Өйткені бұл газдың жастар арасында таралуы өте қауіпті екені дәлелденген.
Темір Қырықбаевтың айтуынша, Астанадағы кейбір клубтарда бір шарик 2000 теңгеге сатылып жатыр. Бұл затты тек клубтарда ғана емес, есігіңе дейін жеткізіп береді. Оның сөзінше, көшеде «көңіл көтеремін» деп жүрген жастардың болашағы өте күмәнді, себебі бұл газ жүйке жүйесін бұзады, мидың жұмысын тоқтатады, аяқ-қолдарды жансыздандырады. Ең қауіптісі — бұл зат адамды байқатпай тәуелді етеді, ақырында мүгедекке айналдырады.
Мәжіліс депутаты наркологтар мен психологтардың осы газды есірткілер қатарына қосу туралы көптеген рет айтқанын, бірақ осы уақытқа дейін ешқандай шара қабылданбағанын жеткізді. Оның пікірінше, Қазақстан да Ұлыбритания мен Нидерланд сияқты бұл газды заңсыз деп жариялауы керек.
«Тыйым салынсын! Бұл – ойыншық емес, бұл – есірткі! Оны қолданғандардың саны артып келеді, ал әрекет жоқ! Біз үнсіз қалсақ, ертең кеш болады. Ертең өкініп қалмау үшін, дәл қазір әрекет ету керек!» — деп қорытындылады Темір Қырықбаев.