RUS
SMARTNEWS.KZ басылымының хабарлауынша, Абай облысы Қарауыл ауылына қарасты Абай атындағы мектеп-гимназия-интернатының мұғалімдері директор Роллан Тлеухановтың заңсыз әрекеттеріне шағымданды. Ұстаздар қара жұмысқа мәжбүрленіп, ай сайын ақша жинауға, директордың жеке шаруасына көмектесуге міндеттелген. Директор мен оның екі ұлы сабақ өтпесе де, жалақы алады. Асхана мен көлік шаруалары да оның отбасының пайдасына жұмыс істейді. Мұғалімдер бұл заңсыздықтарды тиісті органдарға хабарлағанымен, шара қолданылмаған. Бұл туралы Stan.kz жазды.
Абай облыстық білім басқармасына қарасты Абай атындағы мамандандырылған мектеп-гимназия интернатының мұғалімдері директор Роллан Тлеухановтың заңсыз әрекеттеріне шағымданды. Олар директордың өзін билікке қарсы шыққандарды қудалап, мұғалімдерді түрлі жұмысқа жегіп, заңсыз ақша жинауға мәжбүрлейтінін айтады.
Ер мұғалімдер демалыс күндері директордың үйінде немесе оның фермасында құрылыс және шаруашылық жұмыстарын істеуге міндеттелген. Олар үш құдық қазып, үш фундамент құйып, үйдің шатырын ауыстырып, сарай мен монша салған. Директор бұл үшін алғыс айтудың орнына мұғалімдерге дөрекілік көрсетіп, дауыс көтереді. Бұл жағдай ұжымдағы психологиялық ахуалға да кері әсер еткен. Сонымен қатар мектеп басшылығы мұғалімдерден ай сайын 1000 теңгеден жинап отырады. Бұл қаржы оқушылардың стипендиясына деп көрсетілгенімен, оның нақты қайда жұмсалатыны белгісіз.
Директор ұжым есебінен өзінің жүргізушісіне үй сатып алуды ұйғарған. Осы мақсатта әр мұғалімнен 10 000 теңге жинаған.
Бұдан бөлек, кейбір педагогтарға қосымша 0,5 жүктеме тағайындалып, бірақ бұл жалақы директорға қайтарылады. Басшылық бұл қаражат мектепті безендіруге және семинарлар өткізуге жұмсалады деп сендіргенімен, мұғалімдер мұндай іс-шаралардың өтпейтінін айтады.
Директор мен оның екі ұлы сабақ бермесе де, жалақы алады. Оның орнына басқа мұғалімдер дәріс өтеді. Екі ұлы жұмысқа мүлдем келмейді, бірақ 1,5 жүктемеден жалақы алып отыр. Педагогтар іссапар шығындарының дұрыс есептелмейтінін және уақтылы төленбейтінін де мәлімдеді. Олимпиадалар мен түрлі іс-шараларға оқушыларды өз қаражаттарымен апарады. Ал мектептің өз көлігі болса да, оны пайдалануға мүмкіндік жоқ. Мектепте автоүйірме бар деп көрсетілгенімен, ешқандай сабақ өтпейді, арнайы кабинет те жоқ. Оған бөлінген қаражат белгісіз, ал оқушылар жүргізу практикасын жасауға тиіс көлік директордың фермасында қараусыз қалған.
"Директор ер мұғалімдерді шөп шабу және басқа ауыр жұмыстарға да мәжбүрлейді. Келіспегендерді қудалап, жұмыстан шығарады. Мысалы, ол өзінің бір орынбасарын демалыссыз және өтемақысыз жұмыстан босатқан. Тағы бір мәселе – мектеп асханасының жұмысы. Кейінгі бес жылда асхананы "Джумагалиев" жеке кәсіпкер басқарып келеді. Бірақ тағамдар директордың әйеліне тиесілі "Тлебалдина Н.Х." шаруашылығынан жеткізіледі. Бұл өнімдерді мектеп бухгалтері алып келеді, ал оны түсіру міндеті мұғалімдерге жүктелген", – делінген HALYQSTAN арнасында.
Басылымның дерегінше, мұғалімдер осы заңсыздықтардың барлығын еңбек инспекциясына және жоғары тұрған органдарға бірнеше рет хабарлаған. Бірақ тексерулер нәтиже бермеген. Керісінше, шағымданған педагогтардың өздері қараланып, қысымға ұшыраған. Олар мәселені шешуде байланыс пен таныстықтың рөл ойнайтынына сенімді. Қазір ұжым екіге бөлініп, бір бөлігін директор мен оның жақтастары қолдап отыр. Мұғалімдер Бас прокуратура мен Қаржы мониторинг агенттігінен араласуын сұрайды, өйткені жергілікті билікке сенбейді. Ұстаздар барлық фактінің тексерілуін және өз құқықтарының қорғалуын талап етеді. Қызметкерлер өз сөзін чектермен, құжаттармен, хат-хабарлармен, аудио және видео жазбалармен дәлелдей алатындарын айтады.
Редакция бұл мәселеге қатысты Абай облысы білім басқармасынан сұрап көрді.
"2024 жылдың соңында Абай атындағы мамандандырылған мектеп-гимназия интернатының педагогтері тарапынан мектеп директорының қызметіне байланысты бірқатар шағым келіп түсті. Түскен шағымдар негізінде 2024 жылғы 13 қарашада "ҚР Еңбек және халықты әлеуметтік қорғау министрлігі Мемлекеттік еңбек инспекциясы комитетінің Абай облысы бойынша департаменті" тарапынан №966 актімен тексеру жүргізілді. Сонымен қатар Абай облысының білім басқармасы мен облыстық білім саласындағы сапаны қамтамасыз ету департаментінің қатысуымен қосымша ішкі тексерулер ұйымдастырылды", – деп жауап берді білім басқармасы.
Тексеруден кейін мектеп директоры тарапынан бірқатар заңбұзушылық анықталған.
"Жинақталған материалдар негізінде 2024 жылғы 5 желтоқсандағы №01-03/734 бұйрықпен директорға сөгіс түріндегі тәртіптік жаза қолданылды. 2024 жылғы 31 желтоқсандағы №01-03/775 бұйрыққа сәйкес, ол лауазымынан босатылды. Бұл жағдай өткен жылы болған. Қазір білім беру ұйымында тұрақты жұмыс тәртібі қалыптасқан. 2025 жылғы 1 сәуірден бастап "Білім берудегі 1000 көшбасшы" жобасы аясында Абай атындағы мамандандырылған мектеп-гимназия интернатына жаңа директор тағайындалды", – деп түсіндірді Абай облысы білім басқармасы.