RUS
SMARTNEWS.KZ басылымының хабарлауынша, TikTok пен Instagram желілерінде кеңінен тараған видеода сарбаздың кішкентай баланың бас киімін дұрыстап, әскери сәлемді қалай дұрыс беру керектігін үйреткен сәті бейнеленген. Бейнежазба жүз мыңнан астам қаралым жинап, әлеуметтік желі қолданушыларының жүрегін елжіретті.
Видеодағы басты кейіпкер — 24 жастағы Әлішер Жәукешев. Ол — Астана қаласында орналасқан 5573 әскери бөлімінің атқыш-сарбазы. Ақтөбе қаласының тумасы қазіргі таңда ҚР ІІМ Ұлттық ұланы қатарында қызмет атқаруда.
Бұл әсерлі оқиға Ұлы Жеңістің 80 жылдығына арналған шеру кезінде орын алды. Сарбаз Жәукешев сап түзеп тұрған сәтте жанына кішкентай бала келіп, әскери сәлем бермек болады. Алайда ол мұны сол қолымен және бас киімсіз орындаған. Баланың әпкесі дереу оған бас киім кигізеді. Ал бұл сәтте ұландық немқұрайлы қарамай баланың бас киімін дұрыстап, әскери сәлемді оң қолмен қалай дұрыс беру керектігін көрсетті.
Әскери қызметшінің бұл қылығы көпшіліктің назарынан тыс қалғанжоқ. Желі қолданушылары сарбаздың сабырлылығына, елгезектігіне жәнемейірімділігіне тәнті болып, оны нағыз ұландыққа тән деп бағалап жатыр.
«Керемет, қарапайымдылық адамды көрікті етеді», «Нағыз Отанқорғаушысының үлгісі! Мейірімді,кішіге- ізет, үлкенге - құрмет көрсетіп тұр. Ер азаматты дәл осылай тәрбиелеу керек! Бұл сәт бала үшін өмір бойы естеқалары анық!» — деп бөлісуде желі қолданушылары.
Әлішердің өзі тосыннан келген танымалдылыққа байыппен қарайды:
— Әскери борышты өтеу мен Отанға қызмет ету ешқашан кеш емес, — дейді ол. — Егер менің әрекетім біреудің жанын жадыратып, мақтанышсезімін тудырса, мен үшін бұл — үлкен мәртебе.
Ол өзіне патрульдік қызметтің ерекше ұнағанын жасырмайды. Қызмет барысында елордаға деген сүйіспеншілігі одан сайын арта түскен:
— Елордаға екінші рет ғашық болдым. Қаланың көшелерін күзетіп, адамдарға көмек көрсету — менің қоғамға пайдамды тигізуге мүмкіндікберді. Бұл — нағыз мақтаныш сезімі, — дейді Әлішер.
Әлішер Жәукешевтің оқиғасы — әскердегі қызмет тек тәртіп пен міндет қана емес, адамгершілік, үлкенге құрмет, кішіге ізет пен Отанға деген шынайы сүйіспеншілік екенін дәлелдейтін жарқын мысал.