RUS
SMARTNEWS.KZ басылымының хабарлауынша, танымал әнші Сәкен Майғазиев ұлы Әділеттің үйлену тойына әзірлікті бастап кетті. Өнер иесі үй алдындағы абаттандыру жұмыстарымен бөлісіп, құрылыс жасап жатқан жігіттерге алғысын білдірді.
— Өз басым рушылдыққа, жершілдікке қарсымын. Бірақ халқымызда сондай көзқарас қалыптасқан. Қазақтарға «басқа ұлт өкілдері мықты істейді» деп сенбей жатамыз. Келін түсіруге дайындық басталды. Егер келін түспесе, үйдің алдындағы жұмысты да жасамас едік. Жігіттерге рақмет! Сендер де қыз ұзатып, келін түсіріп, осылай мерейленіңдер, — деді әнші.
Айта кетейік, Әділеттің болашақ жары — Әдия Мәулен. Желіде тараған мәліметтерге қарағанда, Әдия — Жаңаөзен тумасы. Кейін отбасымен бірге Ақтауға қоныс аударып, бүгінде Алматыда тұрып жатыр.
— Әділетпен араласқаныма 9 ай болды. Бір-бірімізді 3-4 жылдан бері танимыз. Өзім 20 жастамын. Бізде жас айырмашылығы — 6 жыл. Мамандығым — қонақүй ісі. Колледж бітірдім, болашақта ЖОО-ға түссем деймін. Енемен бірге тұру мәселесіне бейтарап қараймын. Маған көп адаммен бірге шай ішкен ұнайды. Өзімнің де інім бар. Сол себепті ене тақырыбы маған жат емес, — деген еді Әдия.