RUS
SMARTNEWS.KZ басылымының хабарлауынша, елімізде әйелдер арасында кездесетін жатыр мойны қатерлі дерті қатерлі ісік аурулары арасында екінші орында тұр. Бұл туралы Kazinform жазды.
Денсаулық сақтау министрлігінің Ұлттық қоғамдық денсаулық сақтау орталығының басқарма төрағасы Айжан Есмағамбетова мәлімдеуінше, елімізде жыл сайын шамамен 2 000 адамнан қатерлі ісік табылады.
— Жатыр мойны қатерлі ісігінің деңгейі әлемде де, елімізде де өте жоғары. Бұл дерт елімізде әйелдер арасында кездесетін қатерлі ісіктер арасында екінші орында тұр. Әлемде жыл сайын 600 мың адам осы ауруға шалдығады. Қазақстанда орта есеппен жатыр мойын қатерлі ісігіне шалдыққан шамамен 2 мың науқас анықталады, оның 600-і қайтыс болады, яғни әр бесінші әйел жатыр мойны қатерлі ісігінен көз жұмады, - деді Айжан Есмағамбетова елордада өткен іс-шара барысында.
Одан әрі ұлттық орталық басшысы вакцина маңызының үш факторын атады, яғни тиімді, қауіпсіз, әрі репродуктивті функцияға ешқандай әсер етпейді.
— Вакцинациямен қамту деңгейі әр өңірде әртүрлі. Кейбір аймақтарда 60%, кейбірінде 70%-ға жеткен. Дегенмен, вакцинация деңгейі төмен аймақтар да бар. Бұл Атырау облысы, Астана мен Алматы қаласы. Сондықтан мегаполистерде халық арасында түсіндіру жұмыстарын көп жүргізу қажет. Осы орайда семинарлар сериясын елордадан бастаудамыз, - дейді ол.
Айта кетейік, бүгін елордада Ұлттық қоғамдық денсаулық сақтау орталығының ұйытқы болуымен адам папиллома вирусына (АПВ) қарсы екпе егу шарасына арналған конференция өтті. Аталған шараға сала мамандары қатысты.