RUS
3 сәуірде Астанадағы «Rixos President Astana» қонақүйінде орта салмақтағы WBO және IBF тұжырымдары бойынша әлем чемпионы Жәнібек Әлімханұлы мен франциялық Анауэль Нгамиссенгенің қатысуымен баспасөз мәслихаты өтті. Бұл шарада екі дүркін Олимпиада чемпионы, өзбекстандық Баходир Жалолов та сұрақтарға жауап берді.
Жалолов қарсылас таңдау мәселесіне қатысты пікірін білдірді:
«Мен қарсылас таңдаумен айналыспаймын. Маған кіммен шығу керектігін айтады, мен солармен рингке шығамын. Көпшілік менің әлсіз қарсыластармен бокстасатынымды айтып жатады. Қарсыластарды менеджерлер мен промоутерлер табады. Менде әуесқойлар мен кәсіпқойлар арасында ауысулар болып тұрады. Егер маған ақша төлесе, кез келгенімен бокстасуға дайынмын»,- деді боксшы.
Айта кетерлік, бұған дейін спортшының бапкері Тулкин Киличев шәкіртінің әуесқойлар арасында да, кәсіпқой бокста да лайықты қарсыласы жоқ екенін айтқан еді.
«Шын айту керек, мен Баходирге кәсіпқой бокста қарсылас көріп тұрған жоқпын. Оған қазір біраз уақыт керек, кәсіпқой рингке толық бейімделуі тиіс. Барлығына құрметпен қараймын, бірақ Жалоловтай аяқпен жұмыс істейтін ешкім жоқ», - деген еді Киличев.
Мақала авторы: Бірғаным Әлиқызы