Тоғыз жасар баланы жұмбақ бомба жарып жіберді

SMARTNEWS.KZ басылымының хабарлауынша, Таиландта тоғыз жасар мектеп оқушысы үйдегі бомбаның жарылуы салдарынан қаза тапты.

Жергілікті The Thaiger басылымының дерегінше, оқиға 23 наурызда Фичит провинциясында болған, бірақ оқиға куәгері әлеуметтік желіде хабарлама жариялағаннан кейін 2 сәуірде ғана кеңінен жарияланды.

Провинция тұрғынының айтуынша, бала жолда келе жатып, жерде қара целлофанға оралған біртүрлі пакетті байқаған. Қауіпті білмеген бала олжаны қолына алды – сол сәтте жарылыс болды.

"Бала әлі кішкентай еді, қауіпті түсінбесе керек. Ол затты жерден алғанда ол жарылып кеткен. (...) Бұдан бөлек жақын жерден тағы бес бомба табылды. Мәселе оларды жолға кім тастап кеткені. Баланың отбасына көңіл айтамын", - деп жазды жазба авторы. 

Сол жергілікті тұрғынның айтуынша, билік бұл оқиғаға тиісінше мән бермеген: тергеу жүргізілмеді, оның айтуынша, оқиға көп ұзамай «ұмыт болған». Алайда аудан басшылығы болған оқиғадан хабардар екенін растады.

Оның үстіне, белгілі болғандай, осы қайғылы оқиғаға дейін дәл осы ауданда жарылыстар болған. 23 наурызда және одан да бұрын қолдан жасалған үш бомба жарылған. Кейін саперлар тағы бір жарылғыш зат тауып, оны залалсыздандырған.

Жарияланған кезде полиция мен тергеу органдары оқиғаға қатысты түсініктеме бермеген. Күдіктілердің қамауға алынғаны немесе тергеудің барысы туралы ақпарат жоқ.