Биылғы еліміздегі жаз бұрынғыға қарағанда өте ыстық болмақ

SMARTNEWS.KZ басылымының хабарлауынша, cиноптиктердің болжамына сәйкес, биылғы жаз мезгілі алдыңғы жылдармен салыстырғанда айтарлықтай ыстық болмақ.

Бұл жайында экология және табиғи ресурстар министрі Ерлан Нысанбаев Үкімет отырысында мәлімдеді. Оның айтуынша, ауа райының қолайсыздығына байланысты өңірлерде дала және орман өрттерінің қаупі арта түсуі мүмкін.

Қазгидрометтің болжамы бойынша, биыл жаз өткен жылдарға қарағанда ыстық болады. Осыған байланысты облыс әкімдіктері дала өртінің алдын алу және жою бойынша жан-жақты шаралар қабылдап, орман шаруашылықтарының күштері мен құралдарын толық жауынгерлік дайындыққа келтіруі қажет, – деді министр.

Сонымен қатар Ерлан Нысанбаев елімізде жыл басынан бері тіркелген орман өрттерінің статистикасын да жария етті.

Жыл басынан бері еліміздің мемлекеттік орман қоры аумағында жалпы ауданы 4831 гектарды құрайтын 32 орман өрті тіркелген, – деді ол.