Енді 59 жастағы ерлер мен 57 жасқа дейінгі әйелдер ғана «Болашақ» бағдарламасымен шетелде тәлім ала алады

SMARTNEWS.KZ басылымының хабарлауынша, «Болашақ» халықаралық бағдарламасы қоғам қажеттіліктері мен президенттің ұсыныстарына сәйкес үнемі жетілдіріліп отырады.

Жақында бағдарлама талаптарына бірқатар өзгерістер енгізілді. Атап айтқанда, ғылыми тағылымдамаға қатысушылар үшін жас шектеулері белгіленді. Бұл туралы «Халықаралық бағдарламалар орталығы» АҚ басқарма төрағасы Әділ Құсманов Jibek Joly телеарнасындағы «Уәде» бағдарламасына берген сұхбатында мәлімдеді. Ол Ұлттық құрылтай отырысында Президент сынға алған 78 жастағы тағылымдама қатысушысына қатысты пікір білдіріп, бұған дейін бағдарламада жас шектеулерінің болмағанын, зейнет жасындағы азаматтардың да өтініш бере алатынын айтты.

Алайда Мемлекет басшысының сынынан кейін бұл талап қайта қаралып, тиісті өзгерістер министрдің бұйрығымен бекітілген. Енді ғылыми тағылымдамаға қатысу үшін ер адамдарға – 59 жас, әйелдерге – 57 жас шегі белгіленіп отыр. Бұл өзгеріс ресми түрде күшіне енді және бағдарламаға қойылатын талаптардың нақты әрі әділетті болуына бағытталған қадам ретінде бағаланады.