RUS
SMARTNEWS.KZ басылымының хабарлауынша, жағдайға байланысты Оқу-ағарту министрлігіне қарасты Балалардың құқықтарын қорғау комитеті блогер Дариға Нұркееваның (DARICORN) түсірген даулы бейнематериалына байланысты өз ұстанымын жариялады.
Видеодағы әйел кәмелетке толмаған баласының құқықтарының бұзылғанын айтып, шағымданады. Бұл материал танымал блогердің парақшасында жарияланған. Жарнамада баланың «Пицца» деген сөзін блогер «Пися» деп жазып қойған. Соның кесірінен бала желіде және мектепде қатарластарының мазағына ұшыраған.
Комитет бұл оқиғаға жедел назар аударып, бірқатар әрекетке көшкен. Комитет төрайымы Насымжан Оспанова баланың анасымен тікелей байланыс орнатып, оған жан-жақты қолдау көрсетілетінін айтты. Атап айтқанда, психологиялық және заңгерлік көмек ұсынылған. Қажет болған жағдайда, комитет баланың заңды мүдделерін қорғау үшін сот ісіне араласуға дайын екенін жеткізді.
Айта кетейік, Қазақстан Республикасының Азаматтық кодексінің 145-бабына сәйкес, кез келген адамның, оның ішінде баланың бейнесін рұқсатсыз жариялауға болмайды — тек өзі немесе заңды өкілі келісім берген жағдайда ғана мүмкін. Сонымен қатар, «Дербес деректер және оларды қорғау туралы» заңға сәйкес, баланың суреті мен бейнесі құпия деректер қатарына жатады және арнайы заңмен қорғалады.
Комитет барлық блогерлер мен медиа контент жасаушыларға балалардың құқықтарын сақтау керектігін және заң талаптарын бұлжытпай орындау қажеттігін ескертеді. Балалар қатысқан видеолар ниет жақсы болғанның өзінде олардың психологиялық жағдайына зиян келтіруі мүмкін әрі құқықтық жауапкершілікке апарып соғуы ықтимал.