RUS
SMARTNEWS.KZ басылымының хабарлауынша, дәрігерлер Шымкент әкімінің орынбасары Руслан Берденовтің жағдайына қатысты ақпарат берді
Кеше шабуылға ұшыраған Шымкент қаласы әкімінің орынбасары Руслан Берденовтің қазіргі жағдайы туралы ақ халаттылар пікір білдірді.
Берденов ауруханаға ауыр халде жеткізіліп, оған төрт сағаттан астам уақытқа созылған шұғыл операция жасалған.
Қазір оның өміріне тікелей қауіп жоқ екені хабарланды.
"Отадан кейінгі диагноз: оң жақтағы кеуде қуысы тұсына тиген оқ жарақаты, оң жақ өкпенің төменгі бөлігінің, қабырға аралық артериялардың және диафрагманың көптеген жарақаты; оң жақ тұсындағы гемопневмоторакс.
Сондай-ақ бауырдың зақымдануы, құрсақ қуысының көптеген жарақаты, ішкі қан кетулер, оң жақ бүйрек, иық және білек аймағындағы көптеген оқ жарақаты, сыртқы қан кетулер диагнозы қойылды. Плевропульмональдық және геморрагиялық шок алған", - делінген хабарламада.
Қазіргі уақытта Берденовтің жағдайы тұрақты, бірақ ауыр деп бағаланып отыр. Ол дәрігерлердің бақылауында және барлық қажетті медициналық көмек көрсетіліп жатыр.