RUS
SMARTNEWS.KZ басылымының хабарлауынша, Қазақстандағы ең қарт адам Ұлытау облысының Қызылжар ауылында тұрады. 115 жастағы Түймегүл Темірбаева ашаршылық пен қуғын-сүргіннің ауыр зардабын көріп, осы күнге жеткен санаулы жандардың бірі. Бұл туралы 24KZ жаңалықтар қызметі жеткізді.
Түймегүл әже – бірнеше ұрпаққа өнеге болған қайсар жан. Анасынан небары 3 жасында жетім қалған ол ес білгеннен еңбектің жолында келеді.
Жары Аязбай Темірбаев екеуі Сарысу мен Сөрті өзендері бойында жарты ғасыр жылқы баққан.
Қара жұмыстан қажымаған қайсар жанның қимылы әлі де ширақ. Ғасырдан асқан кейуана қартайдым деп үйде қарап отырған жоқ. Жасына қарамай, үй шаруасына белсене араласып, көрпе тігіп, құрт жаюдан қол үзбейді.
"Мал деген оңай емес екен. Жаяу іздеп жүрем. Бие де сауам, бие де байлаймын. Қойды да суарамын, сиырды да суарамын. Бәрін істеп жүріп, қазір шаршап отырмын", - дейді Қазақстандағы ең қарт адам Түймегүл Темірбаева.
115 жастағы әжейдің ұлы ұзақ өмір сүрудің сырын адал еңбек және жақсы ниетпен байланыстырады.
"Көп жасаудың өзі сол жүріп-тұрғандығы ғой. Отырмайды. Ауырса өзін-өзі емдеп алады. Біз ауырдым дегенін естіген жоқпыз. Ауырғанда тұмау болса, дәрі ішіп, жүріп кетеді. Отырмайды, қазір де отырмайды. Сыртқа шығып жан жақтың бәрін байқап жүреді", - дейді әжейдің ұлы Сөртібай Темірбай.
Түймегүл әженің елдегі ең қарт тұрғын екенін Еңбек және халықты әлеуметтік қорғау министрлігі де растаған. Ол қазір бауырынан өрген 4 баладан 15 немере, 25 шөбере сүйіп отыр. Жары Аязбай ақсақал да ғасырға жуық жасап, 95 жасында дүниеден өткен.
Айта кетейік, биыл Көрісу күнінде Ақтөбе облысының әкімі Асхат Шахаров 110 жастағы тыл еңбеккері Жәкібай Бисенғалиеваның үйіне барып, қарт кісімен жүздескен еді.