RUS
SMARTNEWS.KZ басылымының хабарлауынша, АҚШ-тың ішкі қауіпсіздік министрі мейрамханада тоналды.
АҚШ-тың ішкі қауіпсіздік министрі Кристи Ноэм Вашингтон қаласындағы мейрамханада кешкі ас ішіп отырған сәтте ұры шабуылына ұшырады.
CNN арнасы құқық қорғау органдарындағы дереккөздерге сүйене отырып хабарлағандай, министрдің сөмкесін ұрлап кеткен. Онда маңызды құжаттар мен ірі көлемдегі қолма-қол ақша болған.
Ұрланған сөмкенің ішінде жүргізуші куәлігі, дәрі-дәрмектер, пәтер кілттері, паспорт, қызметтік рұқсаттама, косметика, бос чек кітапшасы және шамамен 3 мың АҚШ доллары (1 350 000 теңге) болған. Оқиға демалыс күні қаланың орталығында орналасқан мейрамханалардың бірінде орын алған.
Министрдің қауіпсіздігін қамтамасыз етіп жүрген Құпия қызмет агенттері оқиға орнындағы бейнебақылау камераларын қарап шыққан. Нәтижесінде, ұрының медициналық бетперде киген белгісіз ақ нәсілді ер адам екені анықталған. Қазіргі уақытта оқиғаға байланысты тергеу амалдары жүріп жатыр.