RUS
SMARTNEWS.KZ басылымының хабарлауынша, Ақтау қаласының 35 жастағы тұрғыны, бұдан он жыл бұрын әскери борышын өтеп, кіші сержант атағына дейін көтерілген азамат, қайтадан әскери шақырту алып, таңырқап қалды. Бұл жағдай оны бір мезетте әрі алаңдатып, әрі таңғалдырды.
Олег (кейіпкердің есімі өзгертілген – ред.) 2015 жылы Алматы облысындағы шекара қызметінде мерзімді әскери борышын өтеген. Ол қызметін үздік аяқтап, кіші сержант шенін алған. Арада он жыл өткен соң, оған қалалық қорғаныс істері басқармасына әскери жиындарға қатысу үшін шақырту келіп түскен. Ер адам бұл жайтқа таңырқап: «Мені 35 жасымда қайтадан әскерге шақырып жатыр ма?» деген сауал қойған.
Қорғаныс істері басқармасының түсіндіруінше, ҚР «Әскери қызмет және әскери қызметшілердің мәртебесі туралы» Заңының 33-бабына сәйкес, әскери міндеттілер оқу-жаттығу, тексеру және арнайы жиындарға шақырылуы мүмкін. Егер азамат мұндай жиындарға қатысудан бас тартса, 5 АЕК (19 660 теңге) көлемінде айыппұл салынады.
Айта кетерлігі, әскери жиындар кезінде азаматтың жұмыс орны мен лауазымы сақталады. Ол орташа айлық жалақысын алады. Ал жұмыссыз азаматтарға мемлекеттің есебінен ең төменгі жалақы мөлшерінде өтемақы төленеді.
Белгілі болғандай, жиындар 11 күнге созылады және облыстық спорттық дарынды балаларға арналған мамандандырылған мектеп-интернат-колледж аумағында (демалыс базасы «Золотое солнышко» маңында) өтеді. Оған 200 адам қатысады. Барлық қатысушыларға форма және тамақпен қамтамасыз ету қарастырылған.