RUS
SMARTNEWS.KZ басылымының хабарлауынша, Түркияның Ыстанбұл қаласында орын алған күшті жер сілкінісі салдарынан 236 адам түрлі жарақат алды.
Жер сілкінісі болған сәтте дүрбелеңге түскен адамдардың 151-і қорыққаннан биіктен секіріп, жарақат алған. Қазіргі таңда олардың өміріне қауіп төніп тұрған жоқ, зардап шеккендердің барлығына медициналық көмек көрсетілуде.
Түркия Денсаулық сақтау министрлігі әзірге апаттан көз жұмғандар туралы ресми мәлімет таратқан жоқ.
Апат сәуірдің 23-і күні Ыстанбұлда тіркелді. Жерасты дүмпулері 6,2 балдық қуаттылықпен өлшенген. Қалада афтершоктар әлі де жалғасуда.
Зардап шеккендердің қатарында Қазақстан азаматтарының бар-жоғы туралы әзірге нақты ақпарат жоқ.
Айта кетейік, 2023 жылғы 6 ақпанда Түркияның оңтүстік және оңтүстік-шығыс аймақтарында 7,8 және 7,5 балдық екі жойқын жер сілкінісі тіркелген болатын. Ондаған мың афтершоктың салдарынан жүздеген мың ғимарат қирап, миллиондаған адам баспанасыз қалған еді.