RUS
SMARTNEWS.KZ басылымының хабарлауынша, Ресейдің Украинамен соғысында тұтқынға түскен қазақстандық азамат басынан өткен ауыр оқиғасын «Хочу жить» жобасында баяндады. Ол соғысқа қалай тап болғанын және өмірлік қателігі үшін өкінішін жеткізді.
Жас жігіттің айтуынша, ол жазда Ресейге демалуға барған. Алайда ішімдік ішіп, құқық бұзушылық жасап, полицейлерге ұсталып қалған.
«Мен Қазақстаннанмын. Ұлтым – қазақ. Байқоңырданмын. Жазда Ресейге демалуға барғанмын. Достарыммен ішімдік ішіп, жеткізушінің самокатын ұрлап, бұзақылық жасадық. Мас болғаным соншалық, ең көп ішкен өзім едім. Бұған дейін ішімдік ішіп көрмегенмін», – дейді ол.
Ұсталған соң ол түрмеге түспеу үшін келісімшартқа қол қойып, Ресей әскерінің қатарына алынған.
«Қатты қорқып кеттім. Бұған дейін құқық бұзушылық жасаған емеспін, полиция бөлімшесіне де бірінші рет түстім. Түрмеге отырмау үшін соғысқа баруға келісім беруге мәжбүр болдым. Сол кезде туыстарыма хабарласам, адвокат жалдаймын деп ойлаған едім... Бірақ соғыс алаңында күн сайын өмір мен өлімнің ортасында жүргенше, түрмеде отырғаным әлдеқайда жақсы еді», – деп өкінішін білдірді.