RUS
SMARTNEWS.KZ басылымының хабарлауынша, Qasqir_kz лақап атымен танымал блогер Әли-Әскер Байғожин өзінің үстінен «ұсақ бұзақылық» бабы бойынша іс қозғалғанын мәлімдеді. Бұл туралы ол әлеуметтік желідегі парақшасында жазды.
Оның айтуынша, іс қозғалуына «Ганюшкино департаменті» атты сатиралық сериалдағы кейіпкері себеп болған. Аталған жобада блогер құқық қорғау органдары өкілдерінің бейнесін әжуалап, юморлық түрде көрсетеді.
«Қазір мені «ұсақ бұзақылық» бабымен жауапқа тартуда. Бұған менің «Ганюшкино департаментіндегі» Сәкен деген кейіпкерім себеп болды. Сәкен, сен нағыз оңбаған екенсің. Өзiң қиял әлемінде өмір сүресің, ал сотталып жатқан – мен», – деп жазды Байғожин.
Айта кетейік, Әли-Әскер Байғожин – Алматыдағы Ұлттық қауіпсіздік комитеті академиясының түлегі. Ол Атырау облыстық ҰҚК департаментінде алты жыл қызмет атқарып, кейін қызметтен кеткен соң, әлеуметтік желілерде күштік құрылымдардың ішкі өмірі туралы әзіл-сықақ бағытындағы бейнероликтер жариялай бастаған.
Қазіргі уақытта ресми органдар бұл іске қатысты ешқандай түсініктеме берген жоқ.