RUS
SMARTNEWS.KZ басылымының хабарлауынша, белгілі өнер иесі, қазақтың дәстүрлі өнерін насихаттаушы Айгүл Елшібаева халқымыздың тарихи және мәдени құндылығы саналатын сәукелені көпшілікке паш етті. Бұл ерекше бас киім – қазақ келіншектерінің дәстүрлі сәукелесі, қазіргі таңда Ресейдің Санкт-Петербург қаласындағы Кунсткамерада сақтаулы.
Айгүл Елшібаеваның айтуынша, сәукеленің құны 50 миллион теңгеге бағаланып отыр. Оның үстіне бұл жәдігер – тек материалдық емес, рухани құндылық ретінде де баға жетпес мұра. Сәукеле алтын, күміс, меруерт, асыл тастармен безендірілген және ұлттық ою-өрнекпен көмкерілген.
Өнер иесі бұл жәдігерді алғаш көргендегі сезімін де жасырмады:
«Бұл сәукеленің бағасы 100 аттың құнымен тең. Қазіргі бағамен шамамен 50 миллион теңге тұрады. Қазақтың байлары дәулетін білдіру үшін қыздарын ұзатқанда арнайы зергерлерге соқтырып, алтын, асыл тастармен көмкеріп жасаған.
Бұл сәукелені сыйға тартқан Лайықжан Дербісәліұлы Беркімбаев. Ақтөбе уезінен шыққан Кердері Әбубәкірдің жырларындағы арнауы бар. «Жағалбайлы жиналса, Дербісәліні мақтайды» деп келетін өлең жолдарындағы Жағалбайлы руынан шықққан бай Дербісәлі байдың баласы Лайықжан тапсырған.
Ол кезде 100 қойы бар адам кедей саналған. Бай деп 1000 қойы мен жылқысы бар адамды айтқан. Санкт-Петербург қаласындағы Кунсткамерада осы сәукеле сақтаулы тұр», - деп жазды Айгүл Елшібаева.
Бұл жаңалық ел ішіндегі тарихи жәдігерлердің шетелдегі мұражайларда сақталып, кейде көпшілікке беймәлім болып қалатынын көрсетеді. Сонымен қатар бұл жағдай ұлттық мұраны қайтару, зерттеу және таныту мәселесінің маңыздылығын тағы бір мәрте күн тәртібіне шығарды.