RUS
SMARTNEWS.KZ басылымының хабарлауынша, Түркістан облысында шартты түрде мерзімінен бұрын босатылған блогер Мұрат Әбділда қайта қамауға алынды.
Түркістан облыстық сотының мәліметінше, 2024 жылдың 24 сәуірінде Түркістан қалалық ауданаралық соты Сауран аудандық полиция басқармасының ұсынымын қанағаттандырып, блогер Мұрат Әбділданың шартты түрде босату шарттарын бұзғанын ескере отырып, оның жазасының өтелмеген 2 жыл 11 күнін қайта бас бостандығынан айыру жазасына ауыстыру туралы шешім шығарды.
Мұрат Әбділда 2022 жылы ҚР Қылмыстық кодексінің 174-бабы 1-бөлігі – әлеуметтік, ұлттық, рулық, нәсілдік алауыздықты қоздыру және азаматтардың ұлттық ар-намысы мен қадір-қасиетіне нұқсан келтіретін әрекеттер жасағаны үшін 4 жыл 6 ай мерзімге бас бостандығынан айырылған болатын.
2024 жылы ол Қылмыстық кодекстің 72-бабы негізінде шартты түрде мерзімінен бұрын босатылып, пробациялық бақылаумен жазасын өтеуге мүмкіндік алған. Алайда Түркістан облыстық Полиция департаментінің деректеріне сәйкес, Әбділда босап шыққаннан кейін бірнеше мәрте шарттарды бұзған.
Атап айтқанда, ол қоғамдық орынды ластағаны үшін Әкімшілік құқықбұзушылық туралы кодекстің 434-2-бабы бойынша жауапкершілікке тартылып, айыппұл төлеуге міндеттелген. Сонымен қатар, 2025 жылдың ақпан-наурыз айлары аралығында ол бес рет тіркеуге келмей, төрт рет түнгі уақытта тұрғылықты мекенжайында болмаған.
Сот отырысында Мұрат Әбділда кінәсін ішінара мойындап, соттан тағы бір мүмкіндік беруін сұрады. Алайда сот тәртіп бұзушылықтардың жиілігін және салмақтылығын ескере отырып, прокуратура мен полицияның ұсынысын қолдап, шартты түрде босатуды жойды. Қаулы бойынша ол сот залында бірден қамауға алынды.