RUS
SMARTNEWS.KZ басылымының хабарлауынша, Қызылорда облысы Жаңақорған ауданындағы мемлекеттік балабақшаға барып жүрген төрт жасар Айзия Серікқожаның бір құлағы естімей қалған. Анасы Аруна Ахметованың айтуынша, бүлдіршін тәрбиешінің соққысынан жарақат алған. Құлақ пердесі жарылып, сол күннен бері Айзияның жағдайы нашарлаған. Бұл туралы 31-арнаның Информбюро жаңалықтар бағдарламасы жеткізді.
Оқиға екі ай бұрын №2 «Ұлан» бөбекжайында болған. Балақай кешке құлағы ауырып келген. Түні бойы мазасызданып шыққан қызды анасы келесі күні дәрігерге апарған. Медициналық тексерістен соң, дәрігерлер құлақ пердесінің қатты соққыдан жарылғанын анықтаған. Содан бері Айзияның бір құлағы толық естімей тұр. Анасының сөзінше, бұл жағдай баланың жүйкесіне де кері әсер етіп жатыр.
Алайда бөбекжай қызметкерлері баланы ұрғандарын мойындамаған. Оның үстіне, ата-ананың өтінішіне қарамастан балабақшадағы бейнебақылау камераларының жазбасы көрсетілмеген. Аруна Ахметованың айтуынша, полиция келген кезде камералар қосулы тұрған, бірақ мекеме басшысы құпиясөзді «ұмытып қалғанын» айтқан.
— «Полициямен барған кезде камерасы қосылып тұр. Екі камера тұр екен, құпиясөз сұрап тұр. Бастығы «құпиясөзді бір жерге жазып қойып ем, таппай тұрмын» деп сол күні құпиясөзі айтылмады, камера да ашылған жоқ. Бала өтірік айтпайды. Мен сенемін. Өйткені кішкентай қыздың құлағы тиіп кеткеннен көгермейді. Пердесі тесілмейді. Олар ең құрығанда жауапкершілік танытып, мұны медбикеге айтпаған», – дейді ашынған ана.
Балабақша әкімшілігі бұл жағдайға қатысты нақты жауап бермеді. Тек істі құзырлы органдар қарап жатқанын айтты. Қазіргі уақытта Қылмыстық кодекстің «Кәмелетке толмаған баланы тәрбиелеу жөніндегі міндеттерді орындамау» бабы бойынша тергеу жүргізілуде.