RUS
SMARTNEWS.KZ басылымының хабарлауынша, Алматыда әкіммен кездесуге барған көпбалалы ана полицияға жеткізілді.
24 сәуір күні Алматы қаласының әкімі Ерболат Досаев Алатау ауданының тұрғындарымен №209 мектеп-гимназияда кездесті. Алайда жиын барысында көпбалалы ана Ақжол полиция қызметкерлері тарапынан ұсталып, бөлімшеге жеткізілген. Бұл туралы Facebook қолданушысы Ирина Ким мәлімдеді.
Кимнің айтуынша, Ақжол таңғы 8:15-те мектептегі кездесуге қатысқан. Біраз уақыт өткен соң мектеп директоры мен бөлім меңгерушісі оны «баласының сабағы туралы сөйлесу үшін» сыртқа шақырып алған. Сол сәтте мектептен шығуға әрекеттенген Ақжолды екі полиция қызметкері тоқтатып, ешқандай түсініктемесіз Алатау аудандық полиция басқармасына апарған.
«Ол іште қызы мен сөмкесі қалғанын, тек кездесуге келгенін түсіндірмек болды. Бірақ полиция қолынан ұстап, күштеп алып кетті. Кездесу аяқталған соң босатты», – деп жазады Ирина Ким.
Скрин: Facebook Ирина Ким
Ирина Ким бұған дейін Әуезов ауданында өткен әкіммен кездесуде де тұрғындарға сұрақ қоюға мүмкіндік берілмегенін атап өтті.
«Жалған кездесулер не үшін өтеді? Аида Бұқаева екеумізді микрофонға жолатпады. Жарайды, біз бұл ауданда тұрмаймыз. Бірақ Ақжол Ақкентте тұрады, әлеуметтік осал топтармен жұмыс істейді. Ол неге әкімге сұрақ қоя алмайды? Қазір оған мектеп директорының шағымы негізінде тәртіпсіздік жасады деген айыппен әкімшілік хаттама толтырылып отыр», – деп жазды ол.