RUS
SMARTNEWS.KZ басылымының хабарлауынша, Қырғызстанның Ұлттық қауіпсіздік мемлекеттік комитеті (ҰҚМК) Ош қаласындағы «Русский дом» орталығының қызметкері Наталья Секеринаны ұстады. Оған «өзге мемлекеттегі қарулы қақтығысқа қатысу үшін жалдамалы әскерилерді тарту» бабы бойынша айып тағылып отыр. Бұл туралы «Вечерний Бишкек» басылымы жазды.
ҰҚМК мәліметінше, Секерина Ресей жағында соғысатын адамдарды жинауға қатысы бар деген күдікке ілінген. 19 сәуірде Бішкектің Бірінші Май аудандық соты оны екі айға, яғни 17 маусымға дейін қамауға алу туралы шешім шығарды.
Бұл іс бойынша барлығы төрт адам ұсталған. Олардың бірі — Ош қаласы әкімдігінің баспасөз қызметінің қызметкері Сергей Лапушкин екені белгілі. Қалған екі күдіктінің аты-жөні әзірге жарияланған жоқ.
Қырғызстанда бұған дейін Ресей-Украина соғысына Ресей тарапында қатысқаны үшін үш адам сотталған. Соның бірі — Асқар Кубанычбек уулу. Ол жеті жылға бас бостандығынан айырылғанымен, кейін Ресейге қашып кетіп, сол елдің Қорғаныс министрлігімен жаңа келісімшартқа отырған.