RUS
SMARTNEWS.KZ басылымының хабарлауынша, Түркістан облысында мүмкіндігі шектеулі жігіт 14 жыл бойы туыстарының зорлығына ұшыраған.
Түркістан облысында 24 жастағы мүмкіндігі шектеулі жігіттің 14 жыл бойы жақын туыстары тарапынан зорлық-зомбылық көріп келгені белгілі болды. Бұл туралы жәбірленушінің анасы мәлімдеді дейді Время басылымы.
Анасының айтуынша, оқиға биыл ақпан айында ұлы үйден ақша жоғалғанын айтқаннан кейін анықталған. Ұлы шындықты айтып, бала күнінен бері әкесінің жағынан туыс алты ер адамнан зорлық көріп жүргенін мойындаған. Күдіктілердің бірі – 14 жастағы жасөспірім.
Анасының айтуынша, зорлық әрекеттері видеоға түсіріліп, кейін кішілерге көрсетіліп отырған. Соңғы зорлық 2024 жылдың ақпан айында болған. Осыдан кейін анасы ұлын күнделікті өзімен бірге жұмысқа алып жүруге мәжбүр болған.
– Үлкендері істегенін видеоға түсіріп, кіші інілеріне көрсеткен. Ал кішілері де олардан көріп, қайталай бастаған, – дейді анасы. – Соңғы екі зорлық 7 және 16 ақпанда болған. Үшеуі бірінен соң бірі келген. Ұлым денесінің ауырып, қанап тұрғанын айтып, маған шағымданды.
Аталған жайтқа қатысты полицияға арыз ақпан айында берілген. Бірақ тек қоғам назарын аударғаннан кейін ғана іс облыстық деңгейде бақылауға алынған. Қазіргі таңда бір күдікті қамауға алынып, тергеу амалдары жалғасуда.
– Енді қалай өмір сүремін? Тыныштық, ұйқы жоқ. Қан қысымым көтеріліп кетті. Ең бастысы – ұлым үшін қорқамын, – дейді әйел. – Ақпанда полицияға арыз жаздым. Бірақ жергілікті қызметкерлерден ешқандай әрекет болған жоқ. Ешкімді тергеген де, ұстаған да жоқ. Ал қайын жұртым мені арызды қайтарып алуға көндірмек болды. Бес миллион теңге ұсынды, тек дау шығарма деді. Полициямен өздері келісіп қоямыз деген. Тіпті табын жылқыны сатып, соған ақша жинаған. Бірақ мен ешқашан бұған келіспеймін.
Жәбірленуші қазір Шымкент қаласындағы психологиялық оңалту орталығында ем қабылдап жатыр. Себебі Түркістан облысында мұндай орталық жоқ.
Ал адвокат Гүлайхан Тұрсыманова бұл істі тегін қорғап жатыр. Оның айтуынша, тергеу амалдары толық көлемде жүргізілуде, күдіктілер шеңбері анықталған. Енді сараптама нәтижелерін күтіп отыр.