RUS
SMARTNEWS.KZ басылымының хабарлауынша, АҚШ-тың Қазақстандағы елшілігі визалық сұхбатқа жазылу тәртібі туралы жаңа ақпарат таратты.
Енді 2 мамырдан бастап Астана және Алматы қалаларындағы консулдық бөлімдер виза сұхбатына жазылу мүмкіндігін сұхбат күнінен үш жұмыс күні бұрын сағат 17:00-де тоқтатады.
Мысалы, егер сұхбат 2 мамырға белгіленсе, онда DS-160 өтініш формасындағы барлық ақпарат 28 сәуір күнгі сағат 17:00-ге дейін толықтай толтырылып, жіберілуі тиіс.
DS-160 өтінішіндегі растама хатыңыздағы штрих-код (AA00 басталатын) және сұхбатқа жазылу кезінде енгізілетін штрих-кодтың бірдей болуы шарт.
— Сұхбатқа жазылу жүйесінде дұрыс штрих-код көрсетілгеніне көз жеткізіңіз. Ең жиі кездесетін қателіктердің бірі — нөл санының орнына «O» әрпін жазу. Дұрыс штрих-код әрқашан AA00 форматында басталады, және мұндағы 0 сан ретінде жазылады, — деп түсіндірді елшілік.
Сонымен қатар, DS-160 өтінішінде көрсетілген сұхбат өтетін қала мен сұхбатқа жазылған қала сәйкес келуі керек.
— Егер DS-160 формасында сұхбат орны ретінде Алматы көрсетілсе, ал сіз сұхбатқа Астанаға жазылған болсаңыз, онда жаңа DS-160 өтінішін толтырып, үш жұмыс күні қалғанға дейін жүйеде штрих-код нөмірін жаңартуыңыз қажет, — делінген хабарламада.
Егер сұхбатқа жазылып, бірақ оған келмесеңіз, жүйеде сіздің мәртебеңіз «келмеген» (no show) деп белгіленеді, әрі жаңа DS-160 өтінішін толтыру қажет болады.
Жаңадан толтырылған өтініштің штрих-кодын сұхбатқа кемінде үш жұмыс күні қалғанда жазылу жүйесінде жаңартуыңыз керек.
Өтініш формасы толығымен аяқталып, жіберілген болуы тиіс.
Көптеген үміткерлер DS-160 өтінішін сұхбатқа бір күн қалғанда ғана аяқтауға тырысады. Мұндай жағдайлардың алдын алу үшін өтінішті сұхбатқа кем дегенде үш жұмыс күні қалғанға дейін толтыру керек.
Егер DS-160 өтінішіңіз талаптарға сай болмаса, сұхбатқа белгіленген уақытыңыз жойылып, сізді "келмеген" ретінде белгілейді және сұхбатқа қайта тіркелуіңіз қажет болады.