RUS
SMARTNEWS.KZ басылымының хабарлауынша, «Орал – Маңғыстау» бағытында жүретін жолаушылар пойызының құрамында әйелдерге арналған арнайы вагон қосылады.
«Жолаушылар тасымалы» АҚ 1 маусымнан бастап №614/613 «Орал – Маңғыстау» пойызында әйелдер вагонын іске қосады. Осылайша, елімізде әйелдер вагоны қызметі ұсынылатын бағыттардың жалпы саны 12-ге жетеді.
Қазір әйелдер вагондары мына бағыттарда қатынайды:
-
№77/78 «Алматы – Маңғыстау»;
-
№351/352 «Алматы – Маңғыстау»;
-
№45/46 «Павлодар – Түркістан»;
-
№37/38 «Маңғыстау – Семей»;
-
№47/48 «Атырау – Астана»;
-
№33/34 «Ақтөбе – Алматы»;
-
№4/3 «Астана – Алматы»;
-
№71/72 «Астана – Шымкент»;
-
№354/353 «Астана – Семей»;
-
№24/23 «Ақтөбе – Алматы»;
-
№25/26 «Алматы – Шымкент».
Әйелдер вагондары алғаш рет 2021 жылы енгізілген болатын. Мақсаты — әйелдердің жол жүру кезіндегі жайлылығы мен қауіпсіздігін арттыру. Мұндай вагондарда билеттер тек әйелдерге сатылады және қызмет көрсетуші де тек әйел жолсеріктер болады. Ер адамдардың жол жүруіне тек 7 жасқа дейінгі ұл балаларға рұқсат етіледі.
Пассажирлер әйелдер вагонының артықшылықтарын ерекше атап өтеді: әсіресе түнгі сапарлар мен ұзақ бағыттарда өзін қауіпсіз сезінеді. Сондай-ақ кішкентай баласы бар аналар үшін мұндай жағдай анағұрлым жайлы.
Дегенмен, әйелдер вагондарының енгізілуі — қоғамдық көліктегі қауіпсіздік мәселесінің толық шешілмегенін де көрсетеді. Яғни, жалпы қауіпсіздікті арттырудың орнына, жолаушыларды жынысына қарай бөлуге мәжбүр болғаны да назар аудартады.