RUS
SMARTNEWS.KZ басылымының хабарлауынша, Бішкекте жалдамалы әскер жинауға қатысы бар деген күдікпен ұсталғандар үйқамаққа шығарылды.
Қырғызстанда жалдамалы әскерге адам тартуға байланысты қозғалған қылмыстық іс аясында ұсталғандардың кейбіріне қатысты бұлтартпау шарасы жеңілдетілді. Олардың қатарында Ош қаласындағы "Русский дом" мекемесінің қызметкері мен тағы бір адам бар. Барлығы бұл іс бойынша төрт адамға айып тағылған.
2025 жылғы 28 сәуірде ТАСС агенттігі Бішкектегі Первомай аудандық сотына сілтеме жасай отырып, күдіктілердің – «Русский дом» қызметкері, Ресейден келген блогер және тағы екі адамның үйқамаққа ауыстырылғанын хабарлады.
Алайда "Азаттық" радиосының мәліметінше, үйқамаққа тек екі адам – Ош қаласындағы "Русский дом" мекемесінің өкілі Наталья Секерина мен есімі әзірге жарияланбаған С.В.Т. деген азамат қана жіберілген. Бұл шешім Қырғызстанның Ұлттық қауіпсіздік мемлекеттік комитеті (ҰҚМК) тергеушісінің өтінішімен қабылданған.
Ал осы іс бойынша ұсталған тағы екі күдікті – Ош мэриясының баспасөз қызметінің қызметкері Сергей Лапушкин және өзін «саясаттанушы» әрі «африкатанушы» деп таныстырған Ресей азаматы Виктор Васильев – әлі де қамауда отыр. Олардың адвокаттары бұлтартпау шарасын өзгерту туралы өтініш бермеген.
Айып: шетелдік қарулы қақтығыстарға қатысатын жалдамалыларды тарту
Бұған дейін БАҚ-та Қырғызстанда жалдамалыларды шетелдегі қарулы жанжалдарға қатысу үшін тартты деген күдікпен төрт адамның ұсталғаны хабарланған. Олардың қатарында Ресейдің "Россотрудничество" агенттігінің бөлімшесі саналатын Оштағы "Русский дом" мекемесінің қызметкері де бар. Тергеу амалдарын Қырғызстанның ҰҚМК-нің Бас тергеу басқармасы жүргізіп жатыр. Барлық күдіктілер 17 маусымға дейін қамауда болуға тиіс еді.