RUS
SMARTNEWS.KZ басылымының хабарлауынша, АҚШ-тың федералдық соты «Азаттық радиосына» Конгресс бекіткен 12 миллион долларды бөлуді міндеттеді. Бұл шешім Дональд Трамп әкімшілігінің қаржыландыруды біржақты тоқтатуына қарсы шығарылды.
Федералдық судья Ройс Ламберт 30 сәуірде шығарған шешімінде Трамп әкімшілігі Конгресс мақұлдаған қаражатты тоқтата алмайтынын айтты. Сот АҚШ-тың Жаһандық медиа агенттігінен (USAGM) сәуір айында "Азат Еуропа/Азаттық радиосына" (РСЕ/РС) бөлінетін қаржыны дереу беруді міндеттеді.
Не себеп болды?
«Азаттық радиосының» адвокаттары сотта Трамп әкімшілігінің шешімімен келісімшарттар тоқтатылып, ғимарат жалдау ақысы төленбей, 122 қызметкер жұмыстан шығарылғанын айтты. Егер қаржыландыру қалпына келмесе, 1 мамырда тағы да көптеген журналистер қысқартуға ұшырамақ.
Ал үкіметтің заңгерлері бұл дау Федералдық талап қою сотында қаралуы керек деп есептейді.
Қаржыландыру жалғасуы тиіс
«Азаттық радиосы» 2025 жылдың қазан айына дейін Конгресс бекіткен 77 миллион долларды толық алуы тиіс.
Анықтама үшін:
«Азат Еуропа/Азаттық радиосы» — 1953 жылы құрылған, тәуелсіз медиакорпорация. Оның қызметі АҚШ Конгресі бекіткен бюджет арқылы қаржыландырылады және USAGM агенттігіне қарайды.
2025 жылға дейін бұл ұйымның жұмысына арналған қаржының бір бөлігі түрлі себептермен уақытша тоқтатылып, кейін кей шешімдер қайта қаралды. Трамп билікке қайта келген соң, USAGM мен оған қарасты агенттіктердің жұмысын қысқартуға бұйрық берген болатын.