RUS
SMARTNEWS.KZ басылымының хабарлауынша, 29 сәуір күні Қарағанды облысы Саран қаласындағы дүкен иесінің өліміне қатысты қылмыстық іс бойынша сот процесі басталды. Бұл туралы Halyqstan Telegram-арнасы жазды.
Айыпталушы — 51 жастағы ер адам, ол 27 жастағы әйелді дүкенінде пышақтап өлтіріп, ақшаны алып қашқан деп күдікке ілінген.
Сот отырысында күдікті процесті жабық режимде өткізуді сұрап, өз өміріне қауіп төніп тұрғанын алға тартты. Оның айтуынша, марқұмның туыстарының бірі оған «Сен – өліксің» («Сені өлтіремін» деген сыңайда) деп айтқан.
Дегенмен, судья бұл өтінішті қанағаттандырмады, себебі нақты қауіп дәлелденбеген. Кейін жәбірленуші тараптың туыстары залдан өз еркімен шығып кетті, себебі сотталушы олардың қатысуымен жауап беруден бас тартқан.
Еске сала кетейік, қайғылы оқиға биыл 22 қаңтарда болған. Күдікті жергілікті шағын маркетке шабуыл жасап, 27 жастағы сатушы әйелді пышақпен жарақаттаған. Жәбірленуші оқиға орнында көз жұмған. Қылмыскер кассадан ақшаны алып, қашып кеткен.
Сот барысында сотталушы қарақшылық жасағанын мойындады, алайда кісі өлтіру ниеті болмағанын айтты. Оның сөзінше, әйел қарсылық көрсетіп жатқанда, пышаққа өзі соғылып қалған. Сонымен қатар, ол есірткі әсерінде болғанын және оқиға барысын толық есіне түсіре алмайтынын жеткізді. Кассада 180 мың теңге емес, 30 мың теңге ғана болғанын айтып, бұл ақшаны сол күні есірткіге жұмсағанын да мойындады.
Сотталушының айтуынша, оны бұл қылмысқа бұрыннан таныс бір адам итермелеген және дәл сол адам оған пышақ берген.