RUS
SMARTNEWS.KZ басылымының хабарлауынша, Грекияның солтүстік-шығысындағы Александруполис қаласында 59 жастағы этникалық грек (Грузиядан шыққан) шетелге құпия әскери ақпарат жіберді деген күдікпен тұтқындалды. Оның ұялы телефонынан әскери нысандар мен жабдықтардың суреттері мен видеожазбалары табылған.
Грек полициясының хабарлауынша, күдікті бұл материалдарды арнайы шифрланған мессенджер арқылы шетелге жолдап отырған. Kathimerini басылымы тергеу мәліметтеріне сүйене отырып, тыңшылық операциясының мақсаты — диверсиялық әрекеттер болуы мүмкін екенін жазады.
ERTnews дерегі бойынша, күдіктіні шетелде жүрген адам вербовка жасаған. Ол — халықаралық қылмыстық ұйым мүшесі әрі Ресейдің әскери барлау қызметі (ГРУ) қызметкері болуы ықтимал.
Жергілікті e-evros.gr сайтының мәліметінше, тыңшыны вербовка жасаған адам Литвада тұтқындалған. Ол бұрынғы Кеңес Одағында туған, грек төлқұжаты бар экспат.
Істі Грекияның Ұлттық барлау қызметі тексеріп жатыр. Тергеу жалғасуда.