RUS
SMARTNEWS.KZ басылымының хабарлауынша, Астанада бүлдіршін подъезде көршісі тарапынан жантүршігерлік жағдайға тап болғанын ата-анасына айтып берген.
Оқиға Тәшенов көшесі, 2/3 мекенжайындағы тұрғын үйде болған. Куәгерлердің айтуынша, бұл ер адамға қатысты бірінші шағым емес.
— Қыз бала анасына және көршілерге подъездегі жалаңаш көршісі өзін қорқытқанын айтыпты. Қатты қорыққанынан қабырғаға жабысып тұрып қалған. Бұл жағдай бізді алаңдатып отыр, өйткені балалар үшін қауіп бар. Ержан есімді бұл азамат үнемі агрессия көрсетіп, көршілермен жанжал шығарып, тіпті төбелеседі.
Жақында көршісі оған жалаңаш жүргені үшін ескерту жасаған кезде, әйелді сол жерде ұрып-соққан. Әйел адамның айтуынша, ол балаларға тиіспек болған не болмаса оларды әдейі қорқытқан. Сол себепті әйел полицияға арыз жазды, – делінген тұрғындардың хабарламасында.
Қазір зардап шеккен әйел үйден шығуға қорқып отыр.
Полицияның Liter.kz редакциясына берген жауабында аталған азамат анықталып, сот-медициналық сараптама тағайындалғаны айтылды. Сараптама нәтижесіне қарай процессуалдық шешім қабылданатын болады.